ایف بی آر کو رواں مالی سال کے پہلے 7 ماہ میں 468 ارب روپے خسارے کا سامنا
کراچی: فیڈرل بورڈ آف ریونیو (ایف بی آر) کو موجودہ مالی سال کے پہلے 7 ماہ (جولائی تا جنوری) کے دوران 468 ارب روپے کے بڑے ریونیو خسارے کا سامنا ہے۔
ریونیو شارٹ فال کی سب سے بڑی وجہ ٹیکس مشینری ہے جو مقررہ ہدف 6964 ارب روپے کے مقابلے میں صرف 6496 ارب روپے جمع کر سکی۔
ایف بی آر کا ریونیو خسارہ ہر گزرتے مہینے کے ساتھ مزید بڑھتا جا رہا ہے کیونکہ جنوری 2025 کے لیے عارضی مجموعے کے اعداد و شمار ظاہر کرتے ہیں کہ ایف بی آر نے جنوری 2025 میں 956 ارب روپے کے مطلوبہ ہدف کے مقابلے میں صرف 872 ارب روپے کی وصولی کی ہے۔
872 ارب روپے کی ریونیو وصولی کے ساتھ ایف بی آر نے ماہانہ بنیادوں پر 29 فیصد کی شرح نمو حاصل کی ہے۔
مالی سال کے پہلے چھ ماہ (جولائی تا دسمبر) کے دوران ریونیو خسارہ 384 ارب روپے تھا جو جنوری 2025 میں مزید 84 ارب روپے کے اضافے کے ساتھ بڑھ گیا، اس طرح پہلے 7 ماہ میں مجموعی خسارہ بڑھ کر 468 ارب روپے تک پہنچ گیا ہے۔
