پاکستان اور جنوبی کوریا کے درمیان اقتصادی شراکت داری کا نیا آغاز

اسلام آباد:   پاکستان اور جنوبی کوریا کے درمیان اقتصادی شراکت داری کا نیا آغاز ہوگیا۔

خصوصی سرمایہ کاری سہولت کونسل (ایس آئی ایف سی) کی کاوشوں سے پاکستان کی معیشت کی ترقی کیلئے بین الاقوامی شراکت داریوں کو فروغ مل رہا ہے۔

پاکستان اور جنوبی کوریا کے درمیان اقتصادی شراکت داری کے معاہدے پر دستخط ہوئے، جنوبی کوریا کے وزیر تجارت کی جانب سے کوریا کی صنعتی بنیاد پاکستان منتقل کرنے کا منصوبہ پیش کیا گیا، معاہدہ دونوں ممالک کے درمیان تجارت، سرمایہ کاری اور دیرینہ سفارتی تعلقات کو فروغ دینے کے عزم کا عکاس ہے۔

دونوں ممالک کے نجی شعبوں کے تعلقات کو مستحکم کرنے کیلئے جنوبی کوریا کے وزیر تجارت نے پاکستان میں کاروباری وفد بھیجنے کی خواہش کا اظہار کیا ہے، اس سے خوراک، آئی ٹی، معدنیات، ٹیکسٹائل اور لاجسٹکس جیسے متعدد شعبوں میں نئے تعاون کے مواقع پیدا ہوں گے۔

وفاقی وزیر تجارت جام کمال نے پاکستان اور جنوبی کوریا کے درمیان 1.3 ارب ڈالر سالانہ تجارت کے امکانات پر روشنی ڈالی، پاکستانی کاروباری اداروں کو جنوبی کوریا کی ٹیکنالوجی سے سیکھنے کی اہمیت پر بھی زور دیا۔