شعیب شاہین کا نام سفری پابندی کی لسٹ سے نکالنے کی درخواست پر سماعت ملتوی

اسلام آباد:  اسلام آباد ہائی کورٹ نے پی ٹی آئی رہنما شعیب شاہین کا نام سفری پابندی کی فہرست سے نکالنے کی درخواست پر سماعت ملتوی کردی۔

اسلام آباد ہائی کورٹ کے جسٹس ارباب محمد طاہر نے کیس کی سماعت کی، پی ٹی آئی رہنما شعیب شاہین ذاتی حیثیت میں عدالت پیش ہوئے۔

درخواست گزار نے مؤقف اپنایا کہ پہلے میرا نام پہلے پی این آئی ایل میں ڈالا گیا تھا، عدالتی حکم پر ایف آئی اے نے لسٹ سے میرا نام نکال دیا، سیاسی انتقام کا نشانہ بنانے کیلئے میرا نام پاسپورٹ کنٹرول لسٹ میں دوبارہ ڈالا گیا۔

اس پر نمائندہ ایف آئی اے نے عدالت کو بتایا کہ ہماری طرف سے شعیب شاہین کا نام کسی لسٹ میں نہیں۔

نمائندہ پاسپورٹ آفس نے عدالت کو آگاہ کیا کہ شعیب شاہین کا نام غلطی سے لسٹ میں ڈالا گیا تھا جو اب کلیئر کردیا گیا ہے، شعیب شاہین کا پاسپورٹ ایکٹو کردیا گیا ہے، غلطی پر معافی چاہتے ہیں۔

جسٹس ارباب محمد طاہر نے ریمارکس میں کہا کہ اگر نام دوبارہ کسی لسٹ میں ڈالا گیا تو توہین عدالت ہوگی۔

بعدازاں عدالت نے رہنما تحریک انصاف شعیب شاہین کا نام سفری پابندی کی فہرست میں ڈالنے کیخلاف کیس کی سماعت 13 جنوری تک کیلئے ملتوی کر دی۔