بشریٰ بی بی کی 32 مقدمات میں عبوری ضمانتیں منظور
راولپنڈی: راولپنڈی کی انسداد دہشت گردی عدالت نے سابق وزیراعظم عمران خان کی اہلیہ بشریٰ بی بی کی 32 مقدمات میں عبوری ضمانتیں منظور کر لیں۔
بشریٰ بی بی 26 نومبر سے متعلق راولپنڈی، اٹک اور چکوال کے مختلف تھانوں میں درج 32 مقدمات میں انسداد دہشتگردی عدالت کے جج امجد علی شاہ کی عدالت میں پیش ہوئیں۔
بشریٰ بی بی کے وکیل بھی عدالت میں پیش ہوئے اور عبوری ضمانت کی درخواست پر دلائل دیئے جو عدالت نے منظور کر لیے، بشریٰ بی بی کی جانب سے ضمانتی مچلکے بھی جمع کرائے گئے۔
بعدازاں انسداد دہشتگردی عدالت نے بشریٰ بی بی کی عبوری ضمانتیں 13 جنوری تک منظور کرتے ہوئے سماعت ملتوی کر دی۔
قبل ازیں بانی پی ٹی آئی عمران خان کی اہلیہ بشریٰ بی بی نے 9 مئی سمیت احتجاج کے تمام 32 مقدمات میں خود کو سرنڈر کردیا۔
سابق خاتون اول بشریٰ بی بی اے ٹی سی راولپنڈی میں پیش ہوئیں، بشریٰ بی بی کی گاڑی کو انسداد دہشت گردی عدالت کی حدود میں داخل ہونے کی اجازت دی گئی۔
بشریٰ بی بی کی جانب سے ایڈووکیٹ محمد فیصل ملک نے 32 مقدمات میں ضمانت کی درخواستیں دائر کر دی تھیں۔
