ملک میں 2 ماہ کیلئے سی این جی سٹیشنز بند کرنے کا فیصلہ

اسلام آباد:    حکومت نے ملک بھر میں 2 ماہ کے لیے سی این جی سٹیشنز بند کر نے کا فیصلہ کر لیا۔

ذرائع کے مطابق دسمبر اور جنوری کے سخت سردی والے 2 مہینوں میں ملک بھر میں سی این جی سٹیشنز بند کر دیئے جائیں گے، ان 2 ماہ میں جو ملکی صنعت گیس سے بجلی پیدا کرکے کام کرتی ہے اس کو بھی گیس کی فراہمی بند رہے گی۔

یہ فیصلہ قدرتی گیس کے گھریلو صارفین کو موسم سرما میں مسلسل فراہمی یقینی بنانے کے لیے کیا گیا ہے۔

چاروں صوبوں میں گیس سے بجلی پیدا کرنے یا کیپٹو پاور سٹیشنز کے لیے دسمبر 2024 تا جنوری 2025 تک گیس کی فراہمی روک دی جائے گی، انڈسٹری بجلی کمپنیوں کی بجلی استعمال کرے گی۔

سوئی ناردرن گیس کمپنی لمیٹڈ نے ہدایت کی ہے کہ یکم دسمبر 2024 سے 31 جنوری 2025 تک سی این جی سٹیشنز بند رکھنے کے احکامات جاری کیے جائیں۔