پاکستان سمیت دنیا بھر میں آج شہروں کا عالمی دن منایا جا رہا ہے
کراچی: پاکستان سمیت دنیا بھر میں شہروں کا عالمی دن آج منایا جا رہا ہے۔
31 اکتوبر پاکستان سمیت دنیا بھر میں ورلڈ سٹیز ڈے کے طور پر منایا جاتا ہے جس کا مقصد شہری علاقوں کو درپیش مسائل کے حل، ترقی، عالمی تعاون کے فروغ اور مواقعوں کو اجاگر کرنا ہے۔
اگر ہم پاکستان کے سب سے بڑے شہر کراچی کی بات کریں تو آبادی کے لحاظ سے کراچی دنیا کا 12 واں شہر اور دنیا کے کئی ممالک سے بڑا ہے، شہر کراچی جتنا بڑا ہے اس کے مسائل بھی اتنے ہی زیادہ ہیں تاہم ملکی ترقی میں اہم کردار ادا کرنے کے باوجود شہر قائد کے مسائل آج بھی توجہ طلب ہیں۔
ملک کے سب سے بڑے شہر اور معاشی حب کراچی کو اس کی اہمیت کے مطابق ترقی نہیں دی جا سکی، 2 کروڑ سے زائد آبادی پر مشتمل اس میگاسٹی میں شہری بنیادی سہولیات تک سے محروم ہیں۔
کراچی کی لاکھوں کی آبادی پینے کے صاف پانی کیلئے ترس رہی ہے، سڑکوں کی تباہ حالی، کچرے کا ناقص نظام اور بوسیدہ حال سیوریج سسٹم کے باعث شہری سخت مشکلات سے دوچار ہیں، سٹریٹ کرائم کی وارداتیں بھی معمول بنی ہوئی ہیں۔
شہر قائد میں شہریوں کے تحفظ اور بنیادی سہولیات کی فراہمی کیلئے موثر اقدامات عرصہ سے التوا کا شکار ہیں۔
