افغان ٹیم کا چیمپئنز ٹرافی کیلئے تیاریوں کا آغاز، آج پہلا وارم اپ میچ

لاہور:  افغانستان کرکٹ ٹیم نے چیمپئنز ٹرافی کے لیے تیاریوں کا آغاز کر دیا۔

افغان ٹیم نے ایل سی سی اے گراؤنڈ لاہور میں تین گھنٹے بھرپور پریکٹس کی، آج وہ قذافی سٹیڈیم میں پہلا پریکٹس میچ کھیلے گی۔

آئی سی سی چیمپئینز ٹرافی 2025 کی سرگرمیوں کا لاہور میں آغاز ہو گیا ہے افغانستان کرکٹ ٹیم بدھ کو لاہور پہنچی اور آرام کیا جبکہ جمعرات کو افغانستان ٹیم نے ایل سی سی اے گراؤنڈ میں تین گھنٹے کے ٹریننگ سیشن میں حصہ لیا۔

کھلاڑیوں نے وارم اپ سے سیشن کا آغاز کیا اور پھر گروپس میں فیلڈنگ ڈرلز کیں جبکہ باؤلرز اور بیٹرز نے جم کر نیٹ پریکٹس کی۔

پہلی مرتبہ چیمپئنز ٹرافی کھیلنے والی افغانستان ٹیم آج پاکستان شاہینز کے خلاف پہلا وارم اپ میچ قذافی سٹیڈیم میں کھیلے گی جبکہ دوسرا میچ 16 فروری کو کراچی میں نیوزی لینڈ کے خلاف شیڈول ہے۔

خیال رہے کہ افغانستان ٹیم آئی سی سی چیمپئنز ٹرافی 2025 میں انگلینڈ، آسٹریلیا اور جنوبی افریقہ کے گروپ بی میں شامل ہے۔