بنوں: پولیس چوکی فتح خیل پر دہشت گردوں کا حملہ، 2 اہلکار شہید

بنوں:   بنوں میں دہشت گردوں نے پولیس چوکی پر حملہ کر کے 2 پولیس اہلکاروں کو شہید کر دیا۔

پولیس حکام کے مطابق بنوں میں واقع پولیس چوکی فتح خیل پر رات گئے دہشت گردوں کی جانب سے حملہ کیا گیا جس کے نتیجے میں دو پولیس اہلکار جام شہادت نوش کر گئے، شہید ہونے والے پولیس اہلکاروں میں ضیاء اللہ اور رحیم اللہ شامل ہیں۔

حکام کا کہنا ہے کہ پولیس چوکی فتح خیل پر دہشت گردوں کا یہ تیسرا حملہ ہے۔

دوسری جانب فتح خیل پولیس چوکی حملہ میں شہید اہلکاروں کی نماز جنازہ اقبال شہید لائن میں ادا کر دی گئی، نماز جنازہ میں آر پی او سمیت اعلیٰ حکام نے شرکت کی۔

آر پی او کا کہنا تھا کہ ایسے حملوں سے پولیس کے حوصلے پست نہیں ہوں گے، پولیس کے جوانوں کی قربانیاں لازوال ہیں۔

دریں اثناء وفاقی وزیرداخلہ محسن نقوی نے بنوں میں پولیس چوکی پر خوارجی دہشت گردوں کے حملے کی مذمت کی اور شہید ہونے والے پولیس اہلکاروں کو خراج عقیدت پیش کیا ہے۔

انہوں نے شہید پولیس اہلکاروں کے لواحقین سے دلی ہمدردی و تعزیت کا اظہار کیا جبکہ زخمی پولیس اہلکار کی جلد صحتیابی کیلئے دعا کی۔

محسن نقوی نے کہا کہ خیبرپختونخوا پولیس کے شہید دونوں اہلکاروں کی قربانی کو سلام پیش کرتے ہیں، خیبرپختونخوا پولیس دہشتگردی کے خلاف جنگ میں ہر اول دستے کا کردار ادا کر رہی ہے، پولیس کے بہادر سپوتوں نے جانیں دے کر تاریخ رقم کی ہے، خیبرپختونخوا پولیس کے بہادر سپوتوں کی عظیم قربانیاں رائیگاں نہیں جائیں گی۔