انگلش پریمیئر لیگ میں فٹبال فیلڈ اکھاڑا بن گئی، کھلاڑی گتھم گتھا
گوڈیسن: انگلش پریمیئر لیگ میں فٹبال فیلڈ اکھاڑا بن گئی، کھلاڑی گتھم گتھا ہو گئے۔
گوڈیسن پارک میں کھیلے گئے انگلش پریمیئر لیگ کے آخری میچ میں ایورٹن نے لیورپول کے خلاف انجری ٹائم میں دوسرا گول سکور برابر کرتے ہوئے میچ 2-2 سے ڈرا کردیا۔
مقررہ 90 منٹ کے کھیل کے بعد پانچ منٹ کا ایکسٹرا ٹائم دیا گیا لیکن آن فیلڈ انجری کی وجہ سے اضافی وقت کو بڑھا دیا گیا جس کے نتیجے میں ایورٹن کے جیمز ٹارکوسکی نے 98 ویں منٹ میں برتری کو برابر کیا۔
گول کے بعد ایورٹن کے مداح میدان پر اتر آئے اور کھلاڑیوں کے ساتھ جشن منانے لگے، ریفری نے گول کی تصدیق کے لیے ٹیکنالوجی کی مدد لی اور تصدیق کے بعد دوسری بار جشن منایا گیا۔
تنازع تب کھڑا ہوا جب فل ٹائم کی سیٹی بجنے کے بعد ایورٹن کے عبدالائے ڈوکور بھاگ کر لیورپول کے مداحوں کے سامنے گئے اور جشن منانے لگے۔
لیورپول کے کرٹس جونز ایورٹن کے مڈفیلڈر کی جانب دوڑ کر گئے اور ان کو پیچھے سے پکڑ لیا اور پھر دونوں کھلاڑی گتھم گتھا ہوگئے جن کو بعد ازاں دیگر کھلاڑیوں نے چھڑایا۔
