خیبرپختونخوا حکومت کا مستقبل میں صنعتوں کو رعایتی نرخ میں بجلی دینے کا اعلان

پشاور:   مشیر خزانہ خیبرپختونخوا مزمل اسلم نے کہا کہ وفاقی حکومت کی ناقص بجلی و گیس پالیسی سے ملک میں بڑی صنعتوں کا نظام درہم برہم ہو چکا ہے۔

مشیر خزانہ مزمل اسلم کا کہنا تھا کہ مخدوش صورتحال کو مدنظر رکھتے ہوئے خیبر پختونخوا مستقبل میں صنعتوں کو رعایتی نرخ میں بجلی مہیا کرے گا، خیبرپختونخوا حکومت نئی پالیسی کے تحت گیس بھی مہیا کرنے کی پوزیشن میں ہے۔

مزمل اسلم نے کہا کہ جو صنعتیں 8 سے 9 سینٹس میں بجلی کے حصول کے لئے خواہش مند ہیں خیبرپختونخوا اسے عملی جامہ پہنانے گا، ملکی ٹیکسٹائل صنعت سمیت دیگر کی صوبہ میں حالیہ صنعت سازی میں دلچسپی صوبائی حکومت پر اعتماد ہے۔

انہوں نے کہا کہ جو کاروبار خدمات کے شعبے سے منسلک ہیں انہیں بھی خیبرپختونخوا میں خوش آمدید کہتے ہیں، اگلے بجٹ سے پہلے اپنی کاروباری تجاویز شیئر کریں، ہر طرح کی سہولیات دینے کو تیار ہیں۔

مشیر خزانہ خیبرپختونخوا نے کہا کہ ہمارا مقصد خیبر پختونخوا اور پاکستان کی معیشت کو اپنے پیروں پر کھڑا کرنا ہے۔