پاکستان اور افغانستان کے مابین دوستانہ تعلقات کے خواہاں ہیں: بیرسٹر سیف

پشاور:   مشیر اطلاعات خیبر پختونخوا بیرسٹر ڈاکٹر سیف نے کہا ہے کہ پاکستان اور افغانستان کے مابین دوستانہ تعلقات کے خواہاں ہیں۔

بیرسٹر سیف نے پاکستان میں افغانستان کے قائم مقام سفیر مولوی سردار احمد شکیب سے ملاقات کی، سینئر سیاستدان محمد علی درانی اور مولانا فضل الرحمان خلیل بھی ملاقات میں شریک ہوئے۔

رہنما پی ٹی آئی بیرسٹر سیف نے افغان قیادت کیلئے بانی پی ٹی آئی عمران خان اور وزیراعلیٰ کے پی کی جانب سے افغان قیادت کیلئے خصوصی خیر سگالی پیغام دیا، ملاقات میں پاکستان افغانستان دو طرفہ تعاون پر مبنی تعلقات کے فروغ پر اتفاق کیا گیا۔

ملاقات کے دوران بیرسٹر سیف نے کہا کہ قبائلی و سیاسی عمائدین اور علماء کا وفد افغانستان لانا چاہتے ہیں۔

دوسری جانب افغان سفیر نے بیرسٹر سیف سے گفتگو کرتے ہوئے کہا کہ پاکستان افغانستان تعلقات کی مضبوطی خطے اور عوام کے مفاد میں ہے، پاک افغان تعلقات کی بہتری کیلئے آپ کا کردار قابلِ تعریف ہے۔