خوشدل شاہ کی چیمپئنز ٹرافی سکواڈ میں شمولیت متوقع

لاہور:  قومی آل راؤنڈر خوشدل شاہ کی سہ فریقی سیریز اور چیمپئنز ٹرافی کے لیے پاکستانی سکواڈ میں شمولیت متوقع ہے۔

پی سی بی ذرائع کے مطابق خوشدل شاہ کی حالیہ آل راؤنڈر پرفارمنس کی وجہ سے ان کا نام زیر غور لایا گیا ہے اور اب وہ بھی ون ڈے سکواڈ میں شمولیت کی دوڑ میں شامل ہوگئے ہیں۔

خوشدل شاہ بنگلادیش پریمیئر لیگ میں بھرپور آل راؤنڈر پرفارمنس کا مظاہرہ کر رہے ہیں اور انہوں نے 4 ناقابل شکست 73 ، 59، 46 اور 27 رنز کی اننگز کھیلیں جبکہ 8 میچز میں 11 وکٹیں بھی لے چکے ہیں۔

واضح رہے کہ خوشدل شاہ نے قومی ٹیم کی طرف سے 10 ون ڈے انٹرنیشنل میچز میں 199 رنز بنائے اور 2 وکٹیں لی ہیں جب کہ انہوں نے آخری ون ڈے میچ اگست 2022 میں نیدر لینڈز کے خلاف کھیلا تھا۔