پی ایس ایل 10 کیلئے پلیئرز ڈرافٹ 11 جنوری کو شیڈول
لاہور: پاکستان سپر لیگ (پی ایس ایل) کے 10 ویں ایڈیشن کے لیے پلیئرز ڈرافٹ 11 جنوری کو ہوں گے۔
رواں ہفتے ملکی اور غیر ملکی کھلاڑیوں کی رجسٹریشن شروع ہو جائے گی، پاکستان کرکٹ بورڈ نے ڈرافٹ کا پرومو بھی جاری کر دیا ہے۔
پی ایس ایل ٹین کی پلیئرز ڈرافٹ 11 جنوری کو ہو گی لیکن کہاں ہو گی اس کا فیصلہ ہونا باقی ہے، ایک تجویز یہ بھی ہے کہ ڈرافٹنگ بیرون ملک کی جائے لیکن اس کا فیصلہ رواں ہفتے ہونے والی پی ایس ایل میٹنگ میں کیا جا سکتا ہے۔
ذرائع کے مطابق ملکی اور غیرملکی کھلاڑیوں کی رجسٹریشن کا آغاز رواں ہفتے ہو گا، ایونٹ میں 6 ٹیمیں کراچی کنگز، لاہور قلندرز، ملتان سلطانز، اسلام آباد یونائیٹڈ، پشاور زلمی اور کوئٹہ گلیڈی ایٹرز ایکشن میں ہوں گی۔
واضح رہے کہ دنیائے کرکٹ کی مقبول کرکٹ لیگ ’پاکستان سپر لیگ‘ کا 10 واں ایڈیشن آئی سی سی چیمپنز ٹرافی کی وجہ سے اپریل مئی میں منعقد کیا جائے گا، پی ایس ایل کی حتمی تاریخوں کا اعلان ہونا باقی ہے۔
