کرشنگ سیزن میں شوگر ملز کی مانیٹرنگ کیلئے ایف آئی اے کی خصوصی ٹیمیں تشکیل

لاہور:    ایف آئی اے کرشنگ سیزن میں شوگر ملز کی مانیٹرنگ کرے گی، وزیراعظم کے حکم پر ایف آئی اے نے خصوصی ٹیمیں تشکیل دے دیں۔

ترجمان ایف آئی اے کے مطابق ٹیمیں شوگر ملز میں چینی کی پیداوار، سٹاک کا ریکارڈ رکھیں گی، ٹیکس چوری روکنے کیلئے روزانہ ملز کی سیلز کا ریکارڈ مرتب کیا جائیگا، شوگرملز میں گنے کی آمد، ٹرالیوں کی تعداد کا ریکارڈ بھی مرتب ہو گا۔

ایف آئی اے لاہور زون کی ٹیمیں تین شوگر ملز پر تعینات کردی گئیں، ڈائریکٹر لاہور زون سرفرازخاں ورک نے میٹنگ میں ٹیموں کو ٹاسک سونپ دیئے۔

ڈائریکٹر ایف آئی اے سرفرازخاں ورک نے کہا ہے کہ تمام ٹیمیں انتہائی ذمہ داری اور ایمانداری سے ڈیٹا مرتب کریں، ٹیکس چوری روکنا اہم قومی فریضہ، کوتاہی برداشت نہیں ہو گی۔