حزب اللہ اور اسرائیل سیز فائر تک پہنچنے کیلئے دستیاب موقع سے فائدہ اٹھائیں: فرانس
پیرس: فرانس کے وزیر خارجہ جین نول باروٹ نے لبنان اور اسرائیلیوں پر زور دیا کہ وہ اسرائیل اور حزب اللہ کے درمیان جاری جنگ میں سیز فائر تک پہنچنے کے لیے دستیاب موقع سے فائدہ اٹھائیں۔
وزیر خارجہ جین نول باروٹ نے گفتگو کرتے ہوئے بتایا کہ یہ ایک موقع ہے اور میں تمام فریقوں سے اس سے فائدہ اٹھانے کا مطالبہ کرتا ہوں، انہوں نے کہا کہ سفارت کاری کے ذریعے اور متعلقہ فریقوں کے ساتھ اس معیار پر کام کرتے ہوئے جو اسرائیل کی سلامتی اور لبنانی سرزمین کی سالمیت کو یقینی بنانے کی اجازت دے۔
جین نول باروٹ نے مزید کہا کہ مجھے یقین ہے کہ ہم ایک ایسے حل تک پہنچنے کی راہ پر گامزن ہیں جو تمام فریقوں کے لئے قابل قبول ہوگا، ان کے بیانات امریکی ایلچی آموس ہوچسٹین کے بیانات کے مطابق ہیں جس میں انہوں نے اس ہفتے لبنان اور اسرائیل کے دورے کے دوران جنگ بندی تک پہنچنے کی طرف مزید پیش رفت کی بات کی تھی۔
بین الاقوامی فوجداری عدالت کی طرف سے اسرائیلی وزیر اعظم بنیامین نیتن یاہو کی گرفتاری کے وارنٹ جاری کئے جانے پر نیتن یاہو کے فرانس کے دورہ کرنے کے امکان پر پوچھے گئے سوال پر فرانسیسی وزیر نے کہا یہ ایک فرضی سوال ہے اور میرے پاس فرضی سوال کا جواب نہیں ہے۔
انہوں نے مزید کہا کہ فرانس ہمیشہ بین الاقوامی قانون کا اطلاق کرے گا، یہ میمورنڈم الزام کی رسمی شکل کی نمائندگی کرتا ہے اور یہ کوئی حکم نہیں ہے۔
