بھارتی بزنس مین گوتم اڈانی کا امریکا میں 10 ارب ڈالر سرمایہ کاری کا اعلان

نئی دہلی:   بھارتی بزنس مین گوتم اڈانی نے امریکا میں توانائی اور بنیادی ڈھانچے کے منصوبوں میں 10 ارب ڈالر کی سرمایہ کاری کرنے کے منصوبوں کا اعلان کیا ہے۔

بھارتی میڈیا رپورٹ کے مطابق بھارتی بزنس مین گوتھ اڈانی کی سرمایہ کاری سے امریکا میں ملازمتوں کے 15 ہزار مواقع پیدا ہوں گے، گوتم اڈانی نے ڈونلڈ ٹرمپ کو امریکا کے حالیہ صدارتی انتخابات میں کامیابی پر مبارکباد دیتے ہوئے کہا کہ بھارت اور امریکا کے درمیان شراکت داری میں اضافہ ہو رہا ہے۔

میڈیا رپورٹ کے مطابق گوتم اڈانی نے اڈانی گروپ کی بنیاد 1980ء کی دہائی میں کموڈٹی ٹریڈنگ کے کاروبار کے طور پر رکھی تھی، اس کے بعد سے اس گروپ کا بزنس روایتی اور قابل تجدید توانائی کی پیداوار، بندرگاہوں اور لاجسٹکس، زرعی کاروبار، رئیل اسٹیٹ، مالیاتی خدمات اور دفاع سمیت مختلف شعبوں تک پھیل چکا ہے۔

بلومبرگ بلینیئرز انڈیکس کے مطابق گوتم اڈانی بھارت کے دوسرے امیر ترین شہری ہیں اور عالمی سطح پر دنیا کے امیر ترین افراد میں ان کا 18 واں نمبر ہے، ان کی دولت کا تخمینہ 86.8 ارب ڈالر ہے۔